Machin enfènal ensekirite fè yon lòt viktim nan kapital la. Yvon Pyram se non yon avoka manm bawo Aquin mouri krible ak bal bandi ki t ap sikile sou motosiklèt jodi Mèkredi a nan Thomassin 30, yon zòn nan komin Petyonvil. Apre yo te komèt krim nan, malfra yo te kite zòn nan san pwoblèm dapre temwen yo. Pandan plizyè ane bandi ame yo pratikman alèz yo kidnape, vyole, touye moun san kè sote. Anpil operasyon lapolis nasyonal te lanse jiskaprezan pa reyisi. Anpil moun oblije kite peyi a akoz ensekirite ki anraje a. Preske de lane apre enstalasyon li kòm premye minis kominote entènasyonal la mete, Ariel Henry toujou pa kapab pwoteje popilasyon an. Kantite onisid la ogmante nan lane 2022 a epi li gen tandans ogmante plis paske depi kòmansman ane a deja gen anpil ka peyi a vin trè danjere daprè òganizasyon defans yo.
Nouvo viktim ensekirite ann Ayiti: Mèt Yvon Pyram asasinen nan Thomassin jodi Mèkredi a
