Ayiti-Ensekirite: Jounalis Vision 2000 fè yon arèt travay pou mande liberasyon Jean Thony Lorthé

 Jounalis Radio Vision 2000 yo obsève yon arè travay apati vandredi 17 fevriye sa a pou yo ka mande liberasyon kòlèg yo Jean Thony Lorthé, kidnape depi 3 fevriye ansanm ak frè l Odner Lorthé ak yon fanmi pwòch li. Kidnapè yo mande yon gwo ranson 200,000 dola ameriken ke fanmi an pa gen mwayen pou peye. Lòt jounalis vle lòt kòlèg ak medya pran menm desizyon non sèlman pou yo jwenn liberasyon travayè laprès la ak 2 fanmi l yo, men tou pou denonse fenomèn kidnapin ki ap fè ravaj nan peyi a. Depi kèk tan ensekirite a rive nan pwen ki grav la  ann Ayiti kote pèsonn pa epanye. Bandi yo opere trankilman nan kapital ayisyen an ak nan lòt vil pwovens sa yo ki lakòz anpil lòt moun kouri kite peyi a pa nenpòt mwayen. Popilasyon an toujou ap tann otorite yo pran desizyon drastik kont tout moun k ap simen lapenn epi apovri sitwayen pezib ak onèt yo.