Pou premye fwa, yon ayisyèn dorijin pral reprezante yon distri Eta Florid nan Kongrè Ameriken

Sheila Cherfilus-McCormick genyen eleksyon espesyal ki te fèt madi 11 janvye 2022 sa a nan eta Florid. Li pral reprezante 20yèm distri eta sa a.

Li bat kandida Repibliken Jason Mariner, dapre pwojeksyon CNN fè, majorite Pati Demokrat la ranfòse nan Chanm Depite a.
Pwofesyon li se avoka, Sheila Cherfilus-McCormick rekonèt tankou yon antreprenè ki gen anpil siksè nan Eta Florid la.Li se Prezidan ak Direktè Jeneral Trinity Health Care Services. Yon konpayi ki bay swen sante nan kay nan Konte Miramar.

Eleksyon Madam McCormick ta dwe pèmèt gwoup pwogresis la ogmante manm yo nan chanm bas la.

Pandan kanpay li a, li te pwomèt pou l travay pou regilarize sitiyasyon imigran san papye yo Ozetazini. Li te pwomèt tou pou l travay pou ranfòse lwa sou swen sante abòdab ke yo rele ObamaCare.

Pandan kanpay li a, li te gen tout sipò gwoup pwogresis la ki gen ladan Alexandria Ocasio-Cortez ak Rashida Tlaib. Li te genyen primè yo in extremis ak 5 vòt plis pase advèsè imedya li Dale Holness.

Avèk eleksyon li, Sheila Cherfilus pral fini manda Alcee Hastings, ki te mouri nan mwa avril 2021 nan kansè nan pankreyas. Li sèlman espere pase yon ane nan Kongrè a anvan li retounen nan eleksyon an pou yon manda konplè.

Sheilla Cherfilus McCormick fèt yon 25 janvye 1979 nan Brooklin tou de paran li yo se ayisyen, li gen yon diplòm nan syans politik nan Howard University. Li gen yon diplòm dwa tou nan St. Thomas University.