Otorite Transpò nan Masachousèt (MBTA) pwopoze pou diminye pri transpò piblik pou rezidan nan kèk katye nan Eta Masachousèt.
Responsab MBTA yo prezante yon dokiman ki pwopoze yon rediksyon 50% te nan konsey administrasyon òganizasyon transpò piblik Masqachousèt nan mwa janvye a.
Konsey la pral deside sou pwopozisyon sa a nan mwa mas.
Si li aksepte, mezi sa a pral antre an aplikasyon nan lete 2024, selon fonksyonè MBTA yo.
Pou yo elijib, benefisye potansyèl yo dwe rete nan katye kote rezidan yo pa gen gwo mwayen.
Nouvo pwogram lan pral jwenn sipò administrasyon Healey-Driscoll la, ki prevwa bay $5 milyon dola k ap soti nan bidjè pou ekzèsis fiskal 2024/2025.
Dòchestè, Mattapan ak Roxbury, konsidere kòm katye ki pi pòv nan eta Massachusetts la, ta dwe pami premye benefisyè.
Pifò nan rezidan nan zòn sa yo ap viv anba nivo povrete selon Biwo Travay ak Estatistik Ameriken.
Rezidan nan “vil pòt antre” yo ka patisipe nan pwogram lan tou. Moun ki rete nan zò n sa yo ki genyen ant 26 a 64 lane epi ki gen kek benefis piblik ap atomatikman elijib pou patisipe nan pwogram sa. Men, yo dwe toujou ranpli yon aplikasyon si pwogram lan jwenn apwobasyon direktwa MBTA a.
Pwogram lan pral mete an aplikasyon an kolaborasyon ak lidè kominotè yo pou asire patisipasyon yon maksimòm moun posib, selon responsab MBTA yo nan yon konferans pou laprès nan lendi.
Plizyè liy transpò ki sòti ak rive nan Mattapan, Dòchestè ak Roxbury deja gratis gras ak yon pwogram vil Boston mete kanpe.
Administrasyon Healey la angaje pou fè tout sa ki posib pou asire adopsyon pwogram lan, ki kapap stimile ekonomi Eta Masachousèt, selon yon kominike biwo gouvènè Maura Healey te mete deyò.
Kounye a, konsiltasyon ap fèt pou kolekte kòmantè piblik anvan direktwa MBTA a vote 28 mas k ap vini la.
Direktwa MBTA a genyen ladanl 9 manm. Si 5 nan yo vote pou pwogram nan ap apwouve.
Responsab MBTA ak Eta Masachousèt rete konfyan direktwa ap apwouve pwopozisyon sa.