Ayiti te reklasifye nan pi wo nivo peyi ki danjere pa administrasyon ameriken an, ki konseye sitwayen ameriken yo pou yo evite vwayaje nan peyi sa a oswa nenpòt lòt destinasyon ki klase nan Nivo 4.
Anplis Ayiti, 20 lòt peyi sou lis la, tankou Afganistan, Byelorisi, Burkina Faso, Myanma, Repiblik Santral Afriken an, Repiblik Demokratik Kongo, Iran, Irak, Liban, Libi, Mali, Kore di Nò, Larisi, Somali, Sid Soudan, Soudan, Siri, Ikrèn, Venezyela, ak Yemèn.
Depatman Deta Etazini klase peyi sa yo nan Nivo 4 epi avèti vwayajè ameriken yo pou yo evite tout vwayaj akoz gwo risk ki gen rapò ak krim, teworis, twoub sivil, pwoblèm sante, dezas natirèl potansyèl, ak lòt evènman k ap fèt aktyèlman, daprè yon avètisman vwayaj Depatman Deta pibliye.
Depatman Deta revize avètisman Nivo 1 ak 2 chak ane, pandan avètisman ki pi kritik Nivo 3 ak 4 yo revize chak sis mwa. “Y ap mete ajou avètisman vwayaj la chak fwa gen yon chanjman nan pozisyon gouvènman ameriken an, sitou konsènan pwoblèm sekirite k ap kontinye,” Depatman an deklare, daprè sa Mirror US rapòte.
Gouvènman ameriken an pibliye lis sa a jis kèk jou apre Fritz Alphonse Jean te nonmen kòm chèf Konsèy Prezidansyèl Tranzisyon an, ranplase Leslie Voltaire.
Plizyè òganizasyon politik ak sosyete sivil te mande administrasyon ameriken an pou klase gang Viv Ansanm nan kòm yon òganizasyon teworis. Jiskaprezan, gouvènman ameriken an poko pran okenn desizyon sou sa, pandan ke fòs lòd ayisyen yo ap eseye mete plis presyon sou gang ame yo.
Plizyè gwo operasyon te fèt dènyèman, sa ki te lakòz lanmò plizyè manm gang, daprè responsab Polis Nasyonal d Ayiti (PNH).
23 peyi ak rejyon ki sou Nivo 3—kote vwayajè ameriken yo konseye repanse plan vwayaj yo akoz gwo risk sekirite—gen ladan yo:
Bangladèch, Burundi, Tchad, Kolonbi, Ejip, Etyopi, Gwatemala, Gine-Bisao, Giyàn, Ondiras, Jamayik, Makao, Moritani, Mozanbik, Nouvèl-Kaledoni, Nikaragwa, Nijè, Nijerya, Pakistan, Papwazi-Nouvèl-Gine, Trinidad ak Tobago, Uganda, ak Vanuatu.
Peyi ki klase Nivo 2—kote vwayajè yo konseye pran plis prekosyon akoz risk sekirite ki ogmante—gen ladan yo zile Turks and Caicos. Depatman Deta bay yon avètisman Nivo 2 pou zile sa yo semèn sa a, pou alète touris yo sou pwoblèm krim. Avèk vakans prentan ki ap pwoche, yo konseye vwayajè yo “pran plis prekosyon”. Daprè avètisman an, pifò aktivite kriminèl yo konsantre nan Providenciales, ki sitiye nan nòdwès achipèl Caicos la. Depatman Deta note ke lapolis lokal la ta ka gen resous limite pou fè ankèt.
Peyi ki klase Nivo 1, kote vwayajè yo konseye pran prekosyon nòmal, konsidere kòm pi piti riske. Sepandan, Depatman Deta mete aksan sou lefèt ke tout vwayaj entènasyonal genyen risk, epi li rekòmande vijilans, menm nan rejyon ki pi an sekirite yo.
