Moun ki rete nan vil Boston, nan eta Massachusetts, pral oblije adapte orè yo ak wout vwayaj yo pandan 2 dènye semè n nan mwa oktòb la. Massachusetts Bay Transportation Authority (MBTA), konpayi ki responsab transpò piblik nan Masschusetts, te anonse y ap fèmen liy tren Ashmont branch ak liy Mattapan. Dapre yon deklarasyon ofisyèl ki soti nan MBTA, fèmti sa a pral ap antre an aplikasyon soti 15 pou rive rive 29 oktòb k ap vini la.
Pandan peryòd sa a, se Bis 18 k ap ranplase tanporèman 2 liy tren sa yo. Otobis nimewo 18, ki kouvri wout ki soti Andrew rive Ashmont, ap disponib gratis pou tout itilizatè transpò piblik, jan MBTA fè konnen. Chanjman sa a pral afekte patikilyèman kominote ayisyen an, ki reprezante twazyèm pi gwo kominote imigran nan eta Massachusetts.
Desizyon sa a pral afekte katye Mattapan, sitou ayisyen, paske troley la konekte ak liy wouj la nan Ashmont ki se limit kote tren wouj la rive lè l soti Alewife nan Lwès Vil Cambridge.
Pandan 16 jou fèmti a, MBTA pral ofri yon sèvis navèt gratis epi aksesib pou itilizatè liy Ashmont ak Mattapan. Anplis de sa, liy tren banlye Fairmount ak liy otobis 18 la pral gratis tou pandan peryòd sa a. Liy 18 sèvi estasyon Andrew, Savin Hill, Fields Corner, Shawmut, ak Ashmont. Jan Manadjè Jeneral MBTA a fè remake, desizyon sa a pral pèmèt yo ratrape sou travay reparasyon ki anreta depi lontan.
“Sekirite sistèm MBTA a gen anpil enpòtans, epi fèmti 16 jou sa a pral pèmèt nou adrese anpil nan pi move restriksyon sou vitès liy wouj la pi vit pase si nou t ap travay sèlman lannwit ak wikenn,” Phillip Eng, Manadjè Jeneral ak Direktè Jeneral MBTA te di. Li te ajoute: “Nou konprann ke chanjman sèvis yo ka difisil, e mwen vle remèsye piblik la pou pasyans yo pandan n ap fè travay enpòtan ak vize sa yo ant estasyon JFK/UMass ak Ashmont, ansanm ak sou liy Mattapan la.”
Desizyon sa a vini apre yon direktiv gouvènman federal te mande MBTA pou l antreprann travay reparasyon pi vit posib, an repons a plizyè ensidan ki sot pase yo.
Dapre MBTA a, “wout tren ki genyen ant estasyon JFK/UMass ak Ashmont, ansanm ak liy Mattapan, se pami trak ki pi ansyen yo nan sistèm nan epi yo bezwen ranplase. Devyasyon sa a pral pèmèt ekip yo ranplase ray yo, amelyore fyabilite, epi redwi kondisyon antretyen yo.”
Pandan 16 jou sa yo, enjenyè pi gwo konpayi transpò piblik nan Massachusetts pral pran yon gwo defi, k ap travay 24 èdtan pa jou pou konplete travay ki ta nòmalman pran 6 mwa.
Malgre dènye enkyetid sekirite konsènan tren MBTA, Manadjè Jeneral la asire ke tout bagay ap mache san pwoblèm.
“MBTA kapab akselere travay enpòtan sa yo lè li travay 24è chak jou pou 16 jou ak aksè san restriksyon, sa ki t ap pran 6 mwa si ekip yo te travay sèlman pandan nwit ak wikenn. Apre travay sa a, tout restriksyon vitès yo pral leve nan zòn sa a, pou amelyore tan vwayaj pou itilizatè Ashmont Branch ak Mattapan Line,” daprè a la tèt MBTA a.
Mesaj Pou Ayisyen nan Massachusetts: Tren WOuj la ak liy Mattapan nan pap fonksyone pou 2 semenn