RENAGSANG sispann aktivite li pou mande lage pòtpawòl li a Jean Thony Lorthé

Rezo Nasyonal Gwoup Sang Negatif Rhesus (RENAGSANG) anonse vandredi sa li sispann tout aktivite li pou mande lage pòtpawòl li a, jounalis Jean Thony Lorthé, ansanm ak frè li ak yon lòt fanmi li yo te kidnape depi 3 fevriye 2023, nan Laboule 12, yon zòn ki sitiye nan wotè Petyon-vil (katye lès kapital la) gwoup gang ap kontwole. Renagsang la, ki te onore aktivite yo te planifye deja lontan anvan kidnapin pòtpawòl li a, deplore  jiskaprezan anyen pa fèt malgre mach pasifik Rezo a òganize an konsè ak sosyete jounalis la. “Plis pase kenz jou apre anlèvman l ak de manm fanmi li kidnapè yo fèmen zòrèy yo malgre divès sektè nan lavi nasyonal lanse apèl pou libere li. Sispansyon aktivite sa a se dènye rekou òganizasyon an konsidere  travay renagsang kote Lorthé patisipe anpil kòm yon travay imanitè”, te pwoteste Rezo Nasyonal Gwoup San Negatif Rhesus nan yon nòt pou laprès ki te siyen pa kowòdonatè li a Nancy Lainé. Ranagsang a raple ke ant 11 fevriye ak 15 fevriye, an konsè ak sant fòmasyon nan premye swen ak paramedik an Ayiti (CEFOSEPH), 63 sak san yo te ranmase nan benefis plis pase 150 moun. “Nou pa ka kontinye sove lavi pandan lavi pòtpawòl nou an menase. Nou dwe ensiste paske sispansyon sa a pa pral san konsekans sou lavi  kèk santèn  moun k ap tann sak san sa yo, espesyalman moun ki gen rhesus negatif yo” Konkli deklarasyon an.