Estrikti sosyo-politik Matris Liberasyon angaje ak popilasyon an ki ap manifeste depi plizyè jou kont ogmantasyon pri gaz, ensekirite ak pri lavi ki wo. Matris Liberasyon di li sezi pa desizyon Premye Minis Ariel Henry pran pou ogmante galon gazolin nan plis pase 128% ak kerozèn ak dyezèl de 97%, malgre soufrans popilasyon an te deja soufri ak enflasyon galope, ensekirite, kidnapin, masak repete ak represyon. Estrikti sosyo-politik ansyen senatè Antonio Cheramy ki gen nan tèt li deplore depi lè rejim PHTK a sou pouvwa a pa pran okenn desizyon an favè mas defavorize yo. Pouvwa PHTK a kontante l gaspiye lajan piblik epi favorize yon gwoup ki soti nan sektè biznis prive, sitou nan enpòte pwodui petwòl souliye Matris Liberasyon. Entité a salye kouraj ak detèminasyon pèp ayisyen an ki deside opoze ak volonte gouvènman an ogmante pri gaz sou mache a. Matris Liberasyon gen entansyon rantre nan batay pèp ayisyen an k ap travèse moman boulvèsman sa. Li ankouraje kontinyasyon mobilizasyon an malgre represyon, mizè ak grangou rejim PHTK a enpoze. Konpòtman sinik gouvènman Ariel Henry a se yon deklarasyon lagè kont moun onèt yo, dapre sa nòt la di. Matris Liberasyon ki siyatè akò Montana a fè apèl a tout moun ki siyen akò sa a epi ankouraje yo chita pi vit posib ak tout fòs pwogresis peyi a pou yo ka ranfòse pwopozisyon akò a. Daprè Matris Liberasyon, avangad politik yo pa ta dwe rete endiferan devan atitid Core Group la ak rejim PHTK a, ki ap antre peyi a nan twou san fon akoz atitid yo.
Matris Liberasyon defann popilasyon an epi ankouraje mobilizasyon
