Gouvènè Repibliken Eta Massachusetts la mete veto li sou lwa palman an te pase ki bay dwa pou imigran ilegal yo genyen yon lisans pou kondwi. Pou Charlie Baker, Rejis Veyikil Motè (RMV) “pa gen ekspètiz oswa kapasite pou verifye validite plizyè kalite dokiman ki soti nan lòt peyi”. Nan yon lèt bay lejislatif la Vandredi, Misye Baker eksplike ke li pa nòmal pou bay dokiman sa a moun ki pa ka verifye idantite yo fasil. “Mwen pa ka siyen bòdwo sa a paske li egzije Rejis Veyikil Motor pou bay kalifikasyon chofè leta bay moun ki pa kapab verifye idantite yo,” Baker te ekri nan lèt li a.
Yon desizyon ki pa pral dire lontan depi Chanm Depite a planifye pou anile veto a pandan pwochen sesyon li a 8 jen, daprè jounalis Samantha Gross nan Boston Globe te site nan lokal Journal “National Review”. Sena a gen entansyon fè menm bagay la tou, daprè yon pòtpawòl gwo kò Massachusetts la, jounal la revele. Chèf Eta Massachusetts la fè opozisyon li mwens pase 24 èdtan apre li te resevwa dokiman an nan men Sena a 26 me. Pwojè lwa a te pase pa chanm bas la ak yon majorite akablan 117 an favè ak 36 kont alòske Sena a te pase li ak 32 vòt anfavè ak 8 kont. Yon nimewo ase pou anile nenpòt posibilite pou gouvènman an enpoze veto li a ki ta dwe sèlman yon zak senbolik.
Si yo finalman adopte dokiman an, imigran san papye k ap viv nan Eta Massachusetts yo pral kapab genyen lisans chofè yo apati 1ye jiyè 2023. Sepandan, aplikan yo dwe “bay prèv idantite yo, dat nesans yo ak rezidans yo nan Massachusetts”. Nan prèske 7 milyon moun k ap viv nan eta Massachusetts, anviwon 16% nan yo se imigran. Ayisyen reprezante 5yèm pi gwo gwoup imigran nan eta sa a ak 5% popilasyon total la apre Brezil 5.7%, End 5.9%. Repiblik Dominikèn vin an dezyèm plas ak 7.6% kont 7.8% pou Chinwa yo nan premye pozisyon. Nan prèske yon milyon imigran, 22% nan yon sitiyasyon iregilye. Yo konnen Massachusetts se yon eta sanctuaire pou imigran ilegal yo. Kontrèman ak anpil lòt eta nan Inyon an, imigran nan Massachusetts fè fas ak anpil pèsekisyon nan men ofisye ki fè respekte imigrasyon (ICE). Yo benefisye tou de lòt kalite sipò nan men gouvènman lokal yo.
