1,700 imigran ayisyen, ki gen ladan 76 timoun ak yon douzèn fanm ansent, te depòte nan Repiblik Dominikèn nan de semèn ki sot pase yo la, rapò Gwoup Sipò pou Rapatriye ak Refijye (GARR). ONG a denonse yon “kanpay pèsekisyon” sou ayisyen yo bò kote otorite dominiken yo, ke yo akize yo te komèt “anpil vyolasyon dwa moun”. Plizyè imigran te rive ann Ayiti “avèk siy klè yo se sibi abi fizik” e anpil moun te di yo te arete lakay yo oswa nan travay yo, kote ofisyèl imigrasyon yo te gen aksè san otorizasyon jidisyè. Semèn pase a, otorite yo nan Repiblik Dominikèn te lanse yon gwo operasyon kont imigran san papye nan Ciudad Juan Bosch, yon ibanizasyon bò solèy leve Sendomeng. Jou ki te 18 me a, yon gwoup ayisyen te salye ajan migrasyon yo ak kout wòch, e nan demen Direksyon Jeneral Migrasyon (DGM) te reponn lè l te kenbe 385 ayisyen nan sektè sa a. Bò kote pa l, Gwo Komisyonè Nasyonzini pou Refijye yo (UNHCR) te eksprime enkyetid konsènan vag k ap grandi nan travèse danjere imigran ak refijye atravè Lanmè Karayib la, e li te mande peyi nan rejyon an pou ede yo satisfè obligasyon sovtaj maritim yo. Òganizasyon an te fè apèl la de jou apre 800 refijye ayisyen, ki gen ladann yon ti bebe ki fenk fèt, te debake sou kòt nò Kiba lè bato yo t ap vwayaje a, ki t ap mennen yo Ozetazini, te devye apre kòmandan an te abandone l. Pòtpawòl UNHCR, Shabia Mantoo, fè remake ke nan mwa ki sot pase yo Ayiti se orijin prensipal travèse sa yo: Gad Kòt Ameriken yo rapòte ke yo te entèsepte prèske 3,900 ayisyen an 2022, plis pase doub kantite yo te anrejistre nan menm peryòd ane pase a. Omwen 175 Ayisyen te disparèt oswa mouri nan vwayaj sa yo, dapre chif Gad Kòt Ameriken yo.
Ducasse Mackendy