Lidè Sektè Demokratik ak Popilè a, Mèt André Michel, lanse gwo akizasyon kont Kolèj Prezidansyèl Tranzisyon an (CPT), kote li denonse ipokrizi ak gaspiyaj gouvènman , ki gen entansyon depanse plis pase 300 milyon goud pou selebrasyon Fèt Drapo nasyonal la, fikse pou 18 me k ap vini an.
Antanke lidè politik epi siyatè Akò 21 Desanm nan — ki gen yon reprezantan nan CPT a — Me Michel kritike ak anpil fòs depans ki pwograme pou fèt sa a. Dapre sa li di, CPT a, anba direksyon Fritz Alphonse Jean, prevwa depanse ant 300 ak 400 milyon goud pou aktivite yo. Pou avoka a, se yon som derezonab espesyalman nan yon kontèks kote gen ensikirite, enstabilite enstitisyonèl ak lamizè ap grandi chak jou.
Nan deklarasyon li, Met Michel raple an 2023, gouvènman Doctè Ariel Henry te jwenn anpil kritik paske li te depanse 90 milyon goud pou menm selebrasyon sa a. Li fè remake youn nan moun ki te pi kritik sou sa se te Fritz Jean, ki te prezidan eli Akò Montana lè sa a. “Istwa gen jan li vire!” se sa Me Michel lanse ak ironi, pandan li mete aksan sou gwo kontradiksyon ki genyen ant sa Fritz Jean te konn denonse yè ak sa li ap fè jodi a.
Pou Met Michel, bidjè sa a se yon eskandal, sitou lè li konsidere sitiyasyon sekirite a. “Gang ame kontwole 90% nan kapital la,” li ekri, epi li ajoute : “Gen plis pase 1.4 milyon moun deplase, epi fòs lòd nou yo pa gen anyen pou yo travay ak yo; yo nan kondisyon ekstrèmman difisil.” Pou li, depans sa yo se yon “luks iresponsab” nan yon peyi ki gen difikilte grav, kote enstitisyon yo pa menm kapab reponn bezwen esansyèl popilasyon an.
Avoka a ale pi lwen toujou, li deklare li kòmanse konprann vreman sa ki te dèyè mouvman pou retire Ariel Henry sou pouvwa. Li akize manm CPT yo deske yo te fè alyans ak sa li rele “koalisyon kriminèl ak teworis VIV ANSANM” pou yo te ka pran pouvwa. “Yo te bezwen vini vòlè!”, li lanse san manyen mo, pou montre kantite kòlè li santi.
Pozisyon Me Michel lan tonbe nan yon moman kote opinyon piblik la ap vin de pli zan pli sispèk sou kapasite CPT a pou mennen tranzisyon an byen. Anons depans konsa nan mitan yon kriz grav kapab pi ogmante kantite moun ki pa gen konfyans nan estrikti a. Me Michel fini ak fraz sa a : “Tren dekantasyon istorik la deja sou ray li!” — men, deklarasyon sa a pa manke fè moun sonje li menm pa t janm leve vwa li kont pratik sa yo lè Ariel Henry te sou pouvwa, gen sèlman anviwon yon lane.
