Ant 30 ak 60 santimèt nèj prevwa nan Eta Masachouset ak lot Eta nan rejyon Nodwes la a apati dimanch swa.
Otorite yo mande rezidan yo pa pran wout. Kouran ka koupe pou plizyè jou.
Gouvènè Massachusetts la, Maura Healey, deklare eta dijans an previzyon yon gwo tanpèt ivè ki prevwa apati dimanch swa. An menm tan, li aktive Sant Operasyon Dijans Eta a (SEOC), mobilize jiska 200 manm Gad Nasyonal Massachusetts la epi bay lòd pou anplwaye ki pa esansyèl nan gouvènman an travay adistans lendi.
“Se yon tanpèt sevè ki prezante gwo risk pou sekirite piblik la. Tout moun dwe pran l oserye”, Gouvènè Healey deklare. “M ap deklare eta dijans, m ap aktive Gad Nasyonal la epi m ap bay lòd pou anplwaye ki pa esansyèl nan gouvènman an travay lakay yo. Mwen mande tout anplwayè prive fè menm bagay la. Li esansyèl pou moun rete andeyò wout yo aswè a ak demen.”
Kisa ki prevwa
Sèvis Meteyoloji Nasyonal la (National Weather Service) lanse yon avètisman tanpèt ivè pou sant ak lwès Massachusetts, ansanm ak yon avètisman blizad pou lès Eta a. Ant 30 ak 60 santimèt nèj prevwa ant dimanch swa ak lendi aprèmidi nan tout rejyon an.
Bann nèj entans ta dwe fòme dimanch swa, ak yon to akimilasyon ki ka depase 5 santimèt pa èdtan.
Rafal van yo ap rive ant 65 ak 95 kilomèt/èdtan nan tout Eta a, e jiska 110 kilomèt/èdtan pou Cap Cod ak zile yo. Kondisyon blizad posib, sitou nan sidès Eta a. Nèj lou ak mouye a ka fè branch bwa ak liy elektrik tonbe, sa ki ka lakòz kouran koupe.
Transpò : sa ou dwe konnen
Otorite yo klè nèt : rezidan yo dwe andeyò wout yo apati dimanch swa.
Depatman Transpò Massachusetts la (MassDOT) endike ekip li yo ap trete wout yo davans epi deplwaye plis pase 3 000 ekipman deneijman nan tout Eta a. « Avèk yon gwo tanpèt ivè ki prevwa ak gwo tonbe nèj ak kondisyon blizad nan tout Massachusetts, nou mande piblik la evite tout deplasman ki pa nesesè jiskaske tanpèt la fin pase », Phil Eng deklare, sekretè entèrimè Transpò a ak direktè jeneral MBTA a.
Konsènan transpò piblik la, men sa pou w sonje pou lendi :
Metwo ak otobis MBTA yo ap fonksyone nan yon nivo redui, menm jan ak orè dimanch. Tan datant ap pi long. Anpil otobis ap sikile sou wout nèj yo (Snow Routes). Liy Mattapan nan ap sispann epi yo ap ranplase l ak navèt. Tout liy tren banlye yo ap fonksyone sou orè tanpèt redui yo. Tout sèvis feri ap sispann lendi. Itilizatè transpò adapte a (the RIDE) dwe atann reta.
Pètibasyon yo ta dwe kontinye madi, pandan operasyon netwayaj yo ap fèt.
Tout biwo Registry of Motor Vehicles (RMV) ap fèmen lendi epi tout randevou an pèsonn ap anile. Odyans pou pèmi kondui ap fèt vityèlman.
Pou ayewopò Logan, reta posib akòz operasyon deneijman ak degivraj. Pasaje yo envite verifye ak konpayi avyasyon yo anvan yo ale nan ayewopò a.
Kouran koupe : prepare w pou plizyè jou
Depatman Sèvis Piblik yo (DPU) avèti ke kouran ka koupe epi restorasyon an ka pran plizyè jou. Konpayi elektrisite yo aktive plan entèvansyon dijans yo epi yo deplwaye ekip siplemantè sou Cap Cod, zile yo ak lòt zòn nan Eta a.
Si w wè yon fil elektrik tonbe atè, rele 911 touswit. Si w pèdi kouran, kontakte konpayi elektrisite w la.
Lyetnan-gouvènè Kim Driscoll mande rezidan yo prepare kounye a menm. « Asire w tout aparèy ou yo chaje nèt sizoka kouran ta koupe. Degage nèj la nan tout bouch ayerasyon deyò kay ou. Tanpèt sa a ap enpòtan, kidonk pran nouvèl vwazen w yo epi ann ede youn lòt travèse sa an sekirite. »
Pou machin ou, si w oblije deplase : fè machin ou fè plen gazolin, retire nèj ak glas sou do, kapo, vit ak limyè machin ou anvan w pran wout. Kite plis distans pou frenaj. Pa janm depase yon chas-nèj sou bò dwat epi kenbe yon distans omwen 60 mèt dèyè machin deneijman yo.
Si kouran koupe, chaje telefòn ou, òdinatè pòtab ou ak tout aparèy elektwonik esansyèl ou yo nèt. Itilize flach olye bouji. Si w oblije itilize bouji, kenbe tout bagay ki ka pran dife omwen 30 santimèt lwen epi etenn yo anvan w kite chanm nan oswa anvan w dòmi. Asire w ou gen pil siplemantè pou ekipman medikal ou yo.
Si w ap itilize yon jeneratris, mete l deyò obligatwaman, pa janm anndan kay la ni nan yon garaj ki tache ak kay la. Vire echapman an nan direksyon opoze pòt ak fenèt yo. Kite l refwadi anvan w mete gazolin ladan l. Itilize sèlman ralonj elektrik ki fèt pou deyò. Verifye detektè lafimen ak monoksid kabòn ou yo ap byen fonksyone.
Pou bouch dife yo, si w kapab, degage nèj la sou yon mèt tout otou bouch dife ki pi pre kay ou epi bale yon chemen jiska nan lari a. Minit sa yo ka fè diferans lan si ta gen yon dife.
Apre tanpèt la, verifye bouch ayerasyon deyò kay ou yo pa bouche ak nèj oswa glas. Se yon pwen sekirite ki kritik pou anpeche pwoblèm monoksid kabòn.
Entèdiksyon estasyonman
Depatman Konsèvasyon ak Lwazi a (DCR) mete an plas entèdiksyon estasyonman sou wout li jere yo ansanm ak sou sèten wout MassDOT jere. Machin ki estasyone nan zòn sa yo pandan ijans nèj la ap resevwa kontravansyon epi yo ap remòke yo. Plizyè minisipalite, tankou Boston, pibliye entèdiksyon estasyonman tou. Konsilte anons lokal minisipalite w la.
DCR ap fèmen Winthrop Parkway ant Endicott Avenue ak Broadsound Avenue nan Revere dimanch a 8è diswa pou pèmèt fèmti dig Shore Beach la an previzyon mare tanpèt la. Tout enstalasyon lwazi DCR jere yo, tankou sant dakèy, sant lwazi ak patinwa yo, ap fèmen lendi.
Nivo alèt maksimal la kenbe pou tout Eta Nouvèl Angletè yo (Connecticut, Massachusetts, Maine, New Hampshire, Vermont ak Rhode Island). Se menm bagay la tou pou lòt Eta sou Kòt Lès la : New York, New Jersey, Pennsylvania, Delaware, Maryland, Virginia ak Distri Kolonbya (Washington D.C.).
Otorite yo prevwa gwo tonbe nèj ki ka lakòz wout bloke, kouran koupe ak lòt dega.
Gen moun ki ka oblije rete kote yo travay la pou plizyè jou.
Si w pa t gentan fè sa, ale nan makèt ki pi pre w la touswit. Achte dlo, manje ak lòt bagay esansyèl. Fè pwovizyon pou plizyè jou. Menm yon semèn.
Pa kite timoun nan kay pou kont yo. Si patwon w mande w rete nan travay pandan w gen timoun ki pa gen okenn lòt moun ki pou sipèvize yo, pa rete.
Chaje telefòn ou nèt sizoka kouran ta koupe lakay ou pou w ka rele nimewo ijans si nesesè.
Se vre prediksyon yo pa toujou ekzat, men pito w twò prepare pase w pa prepare ditou.
Resous ak kontak itil
Pou kondisyon wout yo : telechaje aplikasyon Mass511 oswa vizite www.mass511.com. Ou ka rele 511 tou pou konnen kondisyon yo an tan reyèl.
Pou transpò piblik : abòne w nan T-Alerts, telechaje aplikasyon MBTA Go, oswa swiv @MBTA sou X. Sant apèl MBTA a louvri lendi jiska vandredi soti 6è30 rive 8è diswa nan 617-222-3200.
Pou konsèy preparasyon : vizite Mass.gov/Snow.
Pou enfòmasyon sou fèmti pak yo : vizite paj DCR Park Alerts la.
Pran swen tèt ou ak moun pa w yo. Rete lakay ou si posib. Tanpèt sa a serye.
https://ctninfo.com/ht/?p=40211&preview=true
https://www.mass.gov/info-details/winter-storm-safety-tips
